អឺរ៉ុប៖ ម្នាក់មួយគ្រាប់ពី Marcus Rashford, Harry Maguire និង Cristiano Ronaldo បានជួយឱ្យក្រុមម្ចាស់ផ្ទះ Manchester United វាយបកពីក្រោយវិញយ៉ាងតានតឹង ក្នុងជំនួបសប្តាហ៍ទី៣ ពាន UEFA Champions League យប់មិញ បន្ទាប់ពីក្រុមភ្ញៀវ Atalanta នាំមុខមុន ២-០ ក្រោយចប់វគ្គទី១។

ការ​ប្រកួតនៅទឹកដី Old Trafford នេះ ក្រុមភ្ញៀវ Atalanta បានបើកការនាំមុខមុន ២គ្រាប់ដោយកីឡាករ Mario Pasalic នៅនាទីទី១៤ មុនពេលដែលកីឡាករ Merih Demiral បន្ថែមមួយគ្រាប់ទៀតនៅ ១៤នាទីបន្ទាប់។ យ៉ាងណាមិញ ក្រោយបញ្ចប់ការសំរាក ១៥នាទី ម្ចាស់ផ្ទះហាក់មានទំនុកចិត្ត និងសំរុកវាយបកវិញផ្ទួន ៣គ្រាប់ ដោយកីឡាករ Marcus Rashford នាទីទី៥២, Harry Maguire (នាទីទី៧៤)​ និងគ្រាប់ជ័យជម្នះធ្វើបានដោយ Ronaldo នៅនាទី៨០ យកបាន ៣ពិន្ទុជួយឱ្យ Man Utd ឡើងឈរកំពូលតារាងពូល F ឡើងវិញ។

ក្រោយចប់ការប្រកួតនេះ Ronaldo ថ្លែងលើកទឹកចិត្តអ្នកគាំទ្រ និងក្រុមទាំងមូលថា៖ "មែនហើយ! សាលនៃក្តីស្រមៃកំពុងតែពុះកញ្ជ្រោល! ពួកយើងមិនទាន់ទៅណាឡើយ ពួកយើងគឺ Manchester United ហើយពួកយើងមិនដែលបោះបង់ម្តងណាឡើយ។ ទីនេះគឺជាកីឡដ្ឋាន Old Trafford"។

គួរបញ្ជាក់ថា ក្រោយចប់ការប្រកួតយប់មិញ Manchester United បានរំកិលឡើងកំពូលតារាងវិញ ៣ប្រកួតមាន ៦ពិន្ទុ ខណៈ Atalanta និង Villareal មាន ៤ពិន្ទុដូចគ្នា និង Young Boy ឈរបាតតារាងមាន ៣ពិន្ទុ។

ភារកិច្ចបន្តនៅតែជាសម្ពាធសម្រាប់អ្នកចាត់ការ Ole Gunnar Solskjaer និងក្រុមទាំងមូល ត្បិត Manchester United នឹងត្រូវបើកទ្វារកីឡដ្ឋាន Oold Trafford សាជាថ្មីនៅចុងសប្តាហ៍នេះទទួលស្វាគមន៍ហង្សក្រហម Liverpool មុននឹងបន្តប៉ះ Spurs នៅសប្តាហ៍បន្ទាប់ រួចធ្វើដំណើរទៅទឹកដីអ៊ីតាលី ជួបក្រុមម្ចាស់ផ្ទះ Atalanta វិញម្តងនាថ្ងៃទី០៣ ខែវិច្ឆិកាខាងមុខនេះ៕